01| 大学区买妆物 爆拎Samples服务又好

好多人都会去明洞买妆物,贪舖头够集中劲方便,而且店员多数识讲普通话,唔怕沟通唔到!不过近年多咗大陆客爆买,店员见有大生意,当然要冷落香港人,是但招呼就算,甚至黑面真係令人嬲嬲地!其实A君一向唔去明洞,买妆物多数会去大学区(弘大、梨大、建大等),仲一定要行入啲,唔去地铁站附近的舖头,事关员工劲Nice有问必答,而且即使买一支两支,都唔会黑面仲俾劲多Samples,A君试过斋买一支洗面乳就收到成10包Samples,劲夸张!所以话,买妆物一定要行大学区,有时仲会有Discount添呀!

02| 东大门买衫 行得愈入愈有机

想买平衫,好多人都会去东大门,不过A君同大家讲,其实并唔平!讲真,好多游客都剩係行hellp APM、doota等近地铁站的商场,呢类商场主攻游客生意,买衫係海鲜价,但其实已经mark up 30%-40%!想买平衫就一定要行入啲,去DDP旁边真正的批发市场,啲衫真係超级平,不过最麻烦係要批发,又要厚面皮同老闆讲数,同一款又要买几件先肯做生意,实在有啲麻烦!推介同4-5个朋友仔一齐去,又或者係Hostel搵到新同伴再去,咁样讲价买衫比较容易呀!

03| 高速巴士站地下街 买衫平弘大一半

唔想同东大门老闆讲数,好多人都会去弘大、梨大买衫,以为成街都₩10,000衫已经好抵?错!原来去行高速巴士客运的站地下街,会搵到再平啲!A君亲身中过伏,试个在弘大买咗件₩25,000的外套,去到地下街发现同款同色,竟然只係₩10,000,平咗一半有多,真係好心痛呀!个人最推介Goto Mall(高速巴士站地下街),地点唔算远但有约600间店舖,购物狂真係买足一日都唔够喉,想扫平货必去!

04| 首尔扫货 用银联有着数

相信大家都知去百年/明洞换钱最抵,但银联卡其实都唔差!A君多数在香港换定少少钱跟身,去到首尔再睇情况用银联卡揿钱,咁就唔怕走个日用唔晒啲钱!另外A君就试过成功用银联卡当EPS过数买嘢,平过录卡又劲方便呀!最重要係,好多舖头、免税店等用银联卡俾钱仲有额外优惠,即买即扣好抵,就连T-Money增值都有得减手续费,所以去首尔旅行,银联卡真係一定要跟身!